Parehong nakalulungkot at mapagparangya ang napapansin nating pagkamatay ng print media sa kasalukuyan. Ang iba’t ibang uri ng print media ay tumutukoy sa mga publikasyong papel na lumalaganap sa buong mundo sa anyo ng mga libro, magasin, journals at dyaryo na matagal nang nakatutulong sa karamihan upang mahubog ang mga isipan. Mula pa noong unang panahon ay nakapagbibigay ito ng aliw sa mga mambabasa at naging dibersyon ito ng mga tao. Sa mga kabutihang dulot nito, mayroon nga bang kabutihang dala ang pagkawala din nito?
Mula pa ng pagkabata ay patuloy akong sumusubaybay sa mga bagong artikulong darating sa pintuan ng aming halili, ngunit hindi maipagkakailang habang lumilipas ang panahon ay unti-unting nababalot ng teknolohiya ang ating mundo. Ang bangong nalalanghap sa bawat pahina ng mga nobela, ngayon ay tanging mga mata na lang ang makikinabang. Mga dyaryong dating ipinapares sa almusal ay matatagpuan na lamang sa mga basurang kinakalakal. Sa henerasyong ito na nahuhumaling na sa teknolohiya, hindi na bago sa mga tainga ang mga katagang:
“Print Media is dying.”
Ngunit sa kabutihang palad, masasabing nakatutulong din naman sa mga mamamayan ang social media, hindi maipagkakailang mas madaling matuntunan at malapitan ang mg letrang lumilitaw sa isang pindot lamang. Sa bawat katanungang dumarating, limang minuto lang ay ito’y kayang sagutin. Ng dahil sa mabilis na pagsulong ng teknolohiya ay naging mabilis na rin ang paghahatid ng balita. Ang social media ay readily available at mas malawak ang saklaw ng kaniyang mga kaluluwang nahihipo kaya’t sa mga milenyong katulad ko ay malaki ang pakinabang nito.
Sa halip na maging positibo ang epekto ng pagsulong nitong bagong paraan ng pagpapahayag ay nagkakaroon ito ng lamat dahil sa lumalaganap na mga “fake news” na nagiging ugat ng iba’t ibang tunggalian sa bawat sambayanan o mamamayan. Dahil sa mabilisang paraan ng paghahatid ng balita ay nagkaroon din ng pagkakataon ang ibang impormasyong hindi naghahatid ng kabutihan upang mabilisan ding lumaganap at pumasook sa isipan ng bawat isa.
Ang bansang ginagalawan ng social media na hindi na nangangailangan ng beripikasyon upang maipahayag ay nagiging sanhi ng kapahamakan. Hindi naman dapat ganito ang naging epekto kung may tamang disiplina ang mga tao. Ika nga sa ingles “think before you click,” ito ang dapat isipin ng lahat ng taong nais palitan ang print media at pumasok sa social media. Sa pagkamatay ng matapat at maaasahang pahayagan ay lumitaw naman ang panibagong paraan na walang kasiguraduhan. Hahayaan nalang ba natin na mangibabaw ang mapagpanggap na anyong ito?
Ang Pluma 